1995

I däm Johr hän dr Tö, dr Benno und dr Spreiti s'erscht mol am Cortège Basel teilgnoh. Sie sind mit eme Ykaufswägeli vom Coop (nit klaut, sondern lieb aagfrogt) unterwägs gsi. In däm Wägeli hets nur e paar Täfeli, Bliemli, Orange und natirlig Räppli gha. Ä aifachi Sach im kline Rahme. Dört hön die Drey nur gross träumt, emol ufeme Waage d' Fasnacht z'erläbe.

1996

Dr Fortschritt het die Drey ygholt und so hän sie beschlosse, anstatt mit em Ykaufswägeli uf d'Strecki z'goh, es Poschtwägeli zem Fasnachtsvehikel z'vergwaltige. Sie hän denn für Fufzig Frangge am Bahnhof z'Basel e sones Fahrzüg erworbe. Nachdäm sie's fasmachtstauglich umbaue und s'ganze Wurfmaterial - das Johr nit nume zwai Orange und ai Täfeli - bsorgt hän, ischs in Oberwil losgange. Oberwil? - Me het beschlosse, um sich chli uf d'Basler Fasnacht chöne y z'stimme und das Ganzi e chli us z'dehne, au ufem Land Ramba-Zamba z'mache. Nätterwys hän mir dörfe dr Waageclique "Guggus-Waggis" hinte noche fahre. Will die Clique intärni Problem gha het und drum am Fasnachts-Mittwuch zwenig Lüt uf em Waage gsi sind, hän die Drey s'erscht mol dörfe s'Waagefeeling miterläbe.

1997

D' Guggus-Waggis sin noch dr Fasnacht '96 uf ai Mitglied (dr Presidänt) gschrumpft. Dur das Ereignis hän die Drey (und es paar neui, nämlich dr Navarro, dr Günti und dr Gilles) s'erscht mol chöne uf eme "Traktor-Waage" Fasnacht mache. Es isch überraschend gsi, an was me alles mues dänke und was für e riese Ufwand so e Waage-Fasnacht mitsich bringt.

1998

Es het sich denn aber usegstellt, dass au die junge mit em bedütend ältere Presidänt nit so rächt z'schlag cho sind. Me het denn beschlosse, sich vo ihm z'trenne und e uf eigene Füess z'stoh. Do d'Guggus-Waggis e chli e spezielle Ruef gha hän und die Junge unter dene Folge nit hän welle lyde, hän sie beschlosse, dr Name z'ändere. Sie wän eigentlich au nit mit de Guggus-Waggis in Verbindig brocht wärde. Damit me die ganzi Gschicht vo de Stadtdyfeli verstoht, hän mir dänkt, mir erwähne das trotzdäm in dere Chronik. So sind also d'Stadtdyfeli s'erscht mol als Waage-Clique an 'Fasnacht. Durch dä Cliquewächsel hets au e klini Waggismutation gäh. Dr Navarro und dr alti Presidänt sin usträtte und defür sin dr Vittli und dr Martin neui Stadtdyfeli worde. Unter em Sujet "Poschtraub" hän die Siebe in Arlesheim, Oberwil und Basel die mit Räppli verschneyte Stroose unsicher gmacht. Arlesheim? - Do e Grossteil vo de Stadtdyfeli us Arlesheim chunt und s'dörtige Comitè dr Spreiti ufgnoh het, isch beschlosse worde, in däm Dorf dr Kinderumzug no attraktiver z'mache

1999

Unsers Sujet hämr an dr Fasnacht 1999 innere in dr Schwiiz und Düütschland ganz bekannte Frau gwidmet, nämlich niemerz gringerem als dr Uriella. Mit e paar Nöizuegäng, em Ralph, em Björn und em Gisi simr denne 11 Aktivi Fasnächtler gsi, und so hämr dennä d Umzüg in Arlesheim, Oberwil und notürlich Basel in Aagriff gno und kräftig wölle d Lüüt bekehre. Dangg unsere Larve isch es dennä au nid schwer gsi unser Sujet z errote. Au unsere Waggiswaage hämr mit vielne Sprüch und Karikature gschmückt und verziert. Notürlich het jedi Geischtheilere au e Wunderwässerli, öppis wo si drmit alli Bobos und Wehwehlis vo dr Menschheit cha heile …
Notürli hän au mir das drbi kha, unsers Uriellawässerli, e spezielli Mischig wo do aber an dere Stell nid verrote wird…

2000 (Jubiläum)

Mit dr Fasnacht 2000 hämr gliichzitig au unser 5 jöhrigs Beschtoh döörfe fiire. Mit 2 Abgäng und eim wo ne Joor pausiert het simmer dennä no 8 ufgschtellti Aktivi Fasnächtler gsi.

Do mir jo e runde Geburtsdaag z fiire gha hän, simmer entsprächend au mit dr Stammlarve an d Fasnacht. Zu mene Dyfeli ghört notürlich au e Höll, also hämmr us unserem Waggiswaage e riesigi Höll baut, mit Felse, Lavaschtröm, Flamme und Füür und vielem meh. Mitgmacht hämr dennä mit dem Monschtrum an de Umzüg in Arlesheim und Oberwil. Do mir e wildi Clique sin, hämr z Basel am Cortège mit unsrem Waage nit dörfe mitmache ( neui Regelig vom Comité). Also hän mir e acht plätzigs Velo kauft und sin so an Cortège uf Basel gange. Das isch für alli öppis neus gsi und jede het e riese Spass dra gha. Zum erste mol hän mir i däm Joor dr Masggeball und s Guggemonster in Arlesheim ohni fremdi hilf Organisiert Es isch zwar bim Organisiere e bitz Chaotisch zue und här gange aber Schlussändlich hän mir e super Obe uf d Bei gstellt. Sogar e Gwünn hämmr erwirtschaftet was uns brutal Stolz gmacht het.

2001

An dr erschte Fasnacht im nöie Joorduusig simmer 9 Fasnächtler gsi. Mit em Thommy und em Iwan simmer e super Huufe gsi und häns luschtig zäme gha. Öppis wo d Region Basel im Joor 2000 bsunders bewegt het isch dr Verkauf vo
Fäldschlössli an dr Biergigant us Dänemark, an Carlsberg. Also hämr das au als unser Sujet für d Fasnacht 2001 gwählt, d Übernahm vo Fäldschlössli. Us unserem Waage hämr e riesigs Schlössli baut, mit Türmli, Zinne, Backstei und no viel meh. Vo hinte het me dennä au guet s Fäldschlössli Zeiche könne erkenne. Unseri Larve het anstatt enere Nase e grosses Bierglas gha, s Bier isch aber bi jedem nach em erschte mol bugge usglehrt…!

Speziell gfreut het uns in däm Joor dass mir offiziell im Rädäbäng iitreit gsi sin und als Gastclique offiziell am Cortège mitgfahre sin. Wittr simmr no am Umzug in Oberwil bi strahlend schönem Wätter gsi. Au am Kinderumzug in Arlesheim hämr unsere Spass gha. Do mir jo unsere Waage breiter als letscht Joor baut hän, hämr au meh Platz gha für Waggis uf em Waage. Also hämr 8 Kinder vom Sunnehof in Arlesheim mit uf e Waage gno; die hän notürlich e riese Spass gha emol ufemene richtige Waggiswaage mitfahre z dörfe. Zobe isch denn wiedr dr Massgeball und s Guggemonster in Arlesheim ufem Programm gstande. Mit e bitz meh Erfahrig, ischs uns das Joor eifacher gfalle dä Obe z Organisiere. In dr Halle isch e Super Stimmig gsi.

2002

In däm joor simmer no 8 Waggis gsi, dr Günti isch als Präsidänt zrugg trätte und het e Baby Pause gmacht. Dr Tö als Vize Präsidänt isch si nochfolger als Präsidänt worde. Mit em Sujet Popstars hämmer uf die peinliche Uftritt vo de Künstliche Musikgruppene und Sänger in de Medie welle ufmerksam mache. Au das Johr hämmer wieder in Arlesheim, Oberwil und Basel mitgmacht. D Kinder vom Sunnehof sin in Arlesheim mit viel freud und Spass drbi gsi. Zobe hämmer dr
beschti Masggeball gmacht sit mir en mache.

2003

Us irgendwelche komische Gründ vom Arlesheimer „Fasnachtscomite“ hämmer dr Masggeball in däm Johr nüm dörfe Organisiere. Druff abe hämmer unsere Standort Gwächslet und sin vo Arlesheim wäg, e Basler Clique worde. Hän e super Fasnacht erläbt, het eifach alles Passt. Dr Waage isch die neui Wildmaa- Fähri gsi und druff hets 8 Wildi Männer gha.

2004

Will zwei Häftling miteme Löffel e Loch in d Gfängnis Muur grabe hän, isch das für uns ( wie au für vieli anderi Cliquene au) dr Ahlass gsi, die Gschicht als Sujet Usszspiele. Dr Waage isch e Gfängniss miteme riesige Löchrige Emmenthaler Kääs gsi. Und ufem Waage hets 9 Waggis als Daltons verkleidet gha.

2005

Das Joor dörfe D'Stadtdyfeli e kleins Jubiläum fyre, nämlich s'10 Jöörige!! Ganz speziell die Fasnacht sin unseri nöie Stammkoschtüm gsi (me gönnt sich jo sunscht nüd)

2006

Jä sind mir jetzt e Segel oder Schination? Unsere Wage isch e heimeligs Chalet gsi. Vom Wage het e tolle Waggis mit Chäsnase und urchigem Kostüm grüesst

Laufsch am Samschtig Znacht bim Seibi verbi, sehsch unseri Junge mit Bier und Flöäsche Wyy. E Trendsport het sich entwicklet, dr Bottellion het unseri Junge ume Finger gwicklet.Dr Wage isch e Vogelkäfig, wo 10 durschtigi Schluckspächt bewohnt händ.

Dave, Marc, Björn, Thommy, Fabio, Marco, Benno, Gesi, Geri (Lehrling), Hannes (Chauffeur), Iwan

2010

Im Früehlig bis Herbscht 2009 het dr Vincent van Gogh dr Wäg uf Basel gfunde, im Kunstmuseumsin sini Bilder über e halbi Million Bsuecher cho aluege.
Dr Wage isch e fahrends Kunstmuseum gsi.